കവിത :കുഞ്ഞാട്
കവി:വില്ല്യം ബ്ലേയ്ക്ക്
പരിഭാഷ :രാമചന്ദ്രൻ
ബ്ലേയ്ക്കിന്റെ  പ്രസിദ്ധമായ ഈ കവിത ഞാൻ വിവർത്തനം ചെയ്തത് ഏതാണ്ട് അഞ്ചു പതിറ്റാണ്ട് മുൻപാണ്‌.പഴയ കടലാസുകളുടെ  ഇടയില്നിന്നു കണ്ടെടുത്തപ്പോൾ   പ്രസിദ്ധീകരിച്ചാലോ എന്നൊരു കൌതുകം തോന്നി .ഇത്തരം ചിലതെല്ലാം ഇപ്പോൾ കണ്ടുകിട്ടിയിട്ടുണ്ട്.  പഴയ ഭാവുകത്വത്തെക്കുറിച്ചൊരു തിരിഞ്ഞുനോട്ടത്തിനു   വകയുണ്ട്.
        കുഞ്ഞാട്
ആടേ ആടേ കുഞ്ഞാടേ നീ
 ആരുടെ സൃഷ്ടിയതറിയാമോ?              
ആര് നിനക്കീ ഉയിരേകീ ?
അരുവിക്കരയിൽ മൈതാനത്തിൽ
നിനക്ക്  തിന്നാൻ വകയേകീ ?
ആനന്ദത്താലാറാടിക്കും
മിനുത്ത രോമക്കുപ്പായം ;
താഴ്‌വര മുഴുവൻ കേട്ട് കുളിർക്കും
കോമളമായൊരു മൃദുശബ്ദം ;
നിനക്കിതൊക്കെ സമ്മാനിച്ചവ-
നാരെന്നു നിനക്കറിയാമോ  ?    
ആടേ ആടേ കുഞ്ഞാടേ നീ
ആരുടെ സൃഷ്ടിയതറിയാമോ?
ആടേ നിന്നൊടു ഞാൻ ചൊല്ലാം 
ആടേ നിന്നൊടു ഞാൻ ചൊല്ലാം .
നിന്നുടെ പേരാണങ്ങോർക്കും
എങ്ങിനെയാണെന്നറിയണ്ടേ ?
താനുമൊരാട്ടിൻ കുഞ്ഞാണെ -
ന്നങ്ങോർ തന്നെ പറഞ്ഞല്ലോ .
സൌമ്യതയാൽത്തൻ ശാന്തതയാൽ
ചെറിയൊരു ശിശുവായങ്ങോരും.
ഞാനൊരു ശിശു നീയാട്ടിൻകുട്ടി .
അദ്ദേഹത്തിൻ പേരാലല്ലൊ
ലോകം നമ്മെ വിളിക്കുന്നൂ ..
ദൈവം നിന്നെ കാക്കട്ടെ !
ആടേ ആടേ കുഞ്ഞാടേ!
ആടേ ആടേ കുഞ്ഞാടേ !
ദൈവം നിന്നെ കാക്കട്ടെ 1